MUSICA M.I.D.I. MITI RACCONTI POPOLARI E VARIA ATTUALITA'

Tuppe tuppe mariscia'!(De Mura, Aracri, Gigante)
Nisciuno cchiù fatica a stu paese,
songo arze 'e tterre, 'e ppiante só' seccate.
'a gente nun ragiona...è giá nu mese...
'sta cosa nun pò ghí,
no, nun pò ghí...no...
e si nisciuno parla, mo parl'i'...

Tuppe-tuppe marisciá'...
arapite, sò' n'amico...
Mo ve conto mo ve dico
pecché só' venuto ccá...
Tuppe-tuppe marisciá'...
arapite marisciá'!

'A sapite a Carmilina
ca sta 'e casa 'ncoppa scesa?
E' na mala chiappa 'e 'mpesa
vuje ll'avita fá arrestá!
Mo ve dico marisciá'...
mo ve conto marisciá'...

Nisciun'ommo 'e stu paese
da Carmela s'è salvato...
Ogneduno è affatturato
pe' nu vaso ch'essa dá...
Jammo, ja',
Marisciá'...

Pe' capriccio e no p'ammore,
cu nu vaso 'e fuoco ardente,
avvelena a tanta gente:
nun 'e fá cchiù ragggiuná!
E na legge nun ce sta?
Pruvvedite marisciá'...

'Ntuono 'e Cuncetta, Mineco, Pascale...
Vicienzo, Ciro...só' arredutte mieze...
'O farmacista e 'a giunta comunale,
nun sanno cchiù parlá...
no, cchiù parlá...no...
che guajo pe' stu paese marisciá'!

Tuppe-tuppe marisciá'...
arapite, sò' n'amico...
Mo ve conto mo ve dico
pecché só' venuto ccá...
Tuppe-tuppe marisciá'...
arapite marisciá'!

Marisciá' vuje nun parlate?
Ma pecché nun rispunnite?
Marisciá'...che ve sentite?
Nun 'ngarrate cchiù a parlá?!...
Pure vuje v'îta curá...

Bonanotte, marisciá'!..